FilmFimi fyri 10 - 12 ár

Dámar tær filmar, YouTube ella TikTok, og hevur tú hug at skapa tínar egnu søgur á filmi? So er FilmFimi nakað fyri teg. Her læra vit at gera film frá byrjan til enda á ein stuttligan og skapandi hátt.

Vit arbeiða við hugskotum, søgum, upptøkum, ljóði, klipping og sjónleiki frammanfyri og aftanfyri myndatólið. Luttakararnir sleppa at royna ymiskar leiklutir so sum leikara, leikstjóra, fotograf og klippara, meðan vit gera okkara egnu stuttfilmar saman.

Skeiðið er ætlað teimum, sum vilja vera kreativ, arbeiða saman við øðrum og læra at brúka film sum miðil. Dentur verður lagdur á praktiska filmsframleiðslu og gleðina við at skapa film saman. 

FilmFimi er eitt langtíðar frítíðarskeið á 20 vikur, júst sum onnur ganga til fótbólt, dans ella sjónleik, skal eisini bera til at ganga til film. Skeiðið gevur tíð og rúm at menna hugflog, samstarv og skapandi førleikar gjøgnum alt árið.